幸子の親子遊記

2008"春の東京之旅" ~

 

 玩樂篇の"親子暢遊東京"

同小Aimee一齊去旅行,  無論行程plan得幾完美, 最終都難免臨時更改/刪減…..  有小朋友的一定明白, 帶埋佢地去旅行無得急無得趕,  朝早唔願起身啦, 玩玩下要訓覺啦…..etc,  唯有犧牲自己的shopping時間罷!~   不過, 最緊要都係小朋友happy, 咁就大家都開心啦!~  

今次介紹幾個o岩晒一家大細"親子遊"的景點比大家

 

 

 

  Kidzania"兒童王國"的商店和汽車等全部都係細碼"兒童版"~ 除左size之外, 基本上同真實世界的無咩分別 (只係特別cute~)

 

  呢個好似"童話世界"的小城市, 有超過80種以上的"工作"比小朋友參予. 救護員, 消防員, 雪糕店員, 電視拍攝隊, 電台DJ, 美容師, 漫畫家etc, 總之實有"工作"o岩小朋友做~  返完工仲可以賺錢添~   

 

   在廚窗可以睇到小朋友既興奮又落力地工作~  運輸, 果汁店, 急凍食品製造所, 時裝設計..  街道上仲不時有救傷車, 警車, 消防車, 維修車, 旅遊巴等穿梭往來, 連油站, 賽車跑道, 飛機都有~  

 

  未去日本前已上網叫小Aimee揀定想玩乜(因為知道會多人), 佢最恨玩的其中一樣, 就係做小護士接生&照顧初生baby… 但因為在2樓, 玩到最後先去, 已經close左, 小Aimee即場喊左一輪…. 

 

 Mos Burger—–學整漢堡飽!  佢地好認真架, 先著好制服, 黎個小briefing, 洗手, 開始…

 

 整完之後, 我同小Aimee兩個share左個漢堡飽黎食, 乖女做的特別美味~ hehe~   小Aimee一手楂住漢堡飽, 一手楂住"返工"賺左的錢&小小証書~ 

 

 ABC Cooking Studio—–學整日式料理~  呢2件精緻的"花之飯團", 賣相唔錯架~ 見小Aimee又包, 又切, 好似好好玩咁…   每次返完工除左可以享受番自己的"成果"之外, 都會有"薪金&小証書~

 

 

  我同小Aimee一人一件, 味道唔錯喎~  小Aimee仲好興奮咁一輪嘴教我點整添…..

 

  可口可樂汽水廠—-入汽水~ 小Aimee唔飲可樂, 不過佢話好得意, 要整番一樽請媽咪飲~

 

  

 由水樽清潔消毒, 入汽水, 合蓋, 急凍…. 每個步驟一一完成! 味道同街買的一模一樣, 仲夠晒凍~

 

  去銀行開戶口, 申請credit card, 存錢…  小Aimee終於可以自己用ATM喇, 鬼咁開心~   返工賺到的錢, 可以去"迷你"兒童版"三越百貨"shopping~ 

(** 由於小Aimee只得幾十蚊, 佢又唔係好識睇價錢, 我叫佢揀D細細件野好喇, 揀好就在窗口遞比我睇o下夠唔夠錢買先~ 於是佢揀左隻小baby公仔, 遞比我睇, 我示意ok~  佢竟然轉頭繼續揀多5, 6隻唔同款的小baby放入購物籃, 跟住仲想買其他野  …. 幸子即刻"犯規"走入去, 叫佢淨係買一隻就好喇, 唔夠錢呀~   以為ok啦, 點知佢去收銀度比錢果時, 見佢攪一大輪都未攪掂, 又再次"捐"入去睇佢同收銀姐姐攪乜鬼…. 原來收銀姐姐話佢唔肯比錢喎~~  激死~  小Aimee話好鐘意呢度D錢, 唔捨得比, 真係唔知好嬲定好笑…  )

 小Aimee的Kidzania銀包, 入面有用淨的$15蚊, CREDIT CARD, 地圖 & 小証書~ 

 

  呢張相係場內工作人員影o既, 見影得幾靚就買囉!~ 專業係唔同D.. hehe~ 

 

  玩完之後, 就去左Lalaport的"CANDY"食晚餐~ 呢度的裝飾好似"小公主"餐廳, 四圍掛滿大大小小的水晶燈, 最緊要係"兒童餐"吸引嘛~

 

 

 

 

   Pasta,  risotto & 甜品都唔錯架~ 見唔少玩完Kidzania的一家大細都黎呢度開餐呢~

 

小Aimee唔肯離開Kidzanai, 仲喊晒口話要住o係日本喎~  好啦, 媽咪應承之後去東京都會帶小Aimee黎"返工"賺錢架喇!~ hehe!~ ~ 

( 參考資料: Kidzania:  http://www.kidzania.jp/ )

  

 鎌倉"苺狩" + 新江之島水族館

小Aimee同幸子最鐘意魚魚, 所以去旅行一定會去水族館~  之前去過的"橫濱八景島"&"葛西臨海水族館"都highly recommended!!~   今次就去到湘南海岸的"新江之島水族館"~

 先乘JR湘南新宿線去到大船站, 再轉乘"江之電"—-架空單軌電車, 第一站係"深沢"~

 

  途經"深沢"站, 知道有個士多啤梨farm, 就先去"莓狩"喇!~  見到一排排"溫室", 同埋" いちご園" 的字樣, 我地都好興奮…..  hehe, 原來仲有一個小"箭嘴", 未到咋, 仲要繼續行….

 

 終於到喇"鎌倉観光イチゴ園"    30min的"莓之放題" !!~~  由"湘南深沢站"行到士多啤利園大約10多分鐘, 但位置似乎比較偏僻, 感覺好似行左好耐.  小Aimee今次行程講得最多的日文, 除左"ありがとう"之外, 就係"Ichigo"啦~ hehe~  

 

之後, 再坐"江之電"去"新江之島水族館"~   在車站可以望見山上大大的觀音像~  其實可以順路去埋"鐮倉"睇大佛&寺廟, 但今次帶住小Aimee怕佢悶, 所以直去江之島.

  行去江之島水族館的途上, 有多間大大小小的特色小店, 連拉麵店都以滑浪做主題, 四圍都好有"陽光與海灘"的夏日feel~

 

  水族館比原來想像的大好多, 而且好多野睇呢~~   慢慢逛的話, 足足可以消磨一整個下午~

 

 呢度比一般水族館有更多"hands’ on"的活動!  當日係日本假期, 所以小朋友特別多~ 原本想參加同海豚"扼手"的活動, 可惜已爆滿~  

 

 水族館背靠湘南海岸, 即使仍然微泠, 仍然見到唔少滑浪好手乘風破浪, 相信夏天的時候一定濟滿玩水的人潮~   有時間的話, 可以走過跨海大橋到對岸的"江之島", 登上山上的燈塔, 吹下海風, 睇睇湘南海岸公園的美景~ 

 

 水族館有各種各樣的魚類, 海獅, 企鵝, 水母等等, 最受歡迎的應該都係海豚表演~  表演場地後面就係一望無際的海灘, 當日天氣陰陰涼涼, 唔曬, 好舒服~

( 參考資料: 新江ノ島水族館 http://www.enosui.com/)

 

 

 Disney Sea

之前分別同小Aimee去過日本的Disneyland & Disney Sea! 今次佢話一定要再去Disney Sea見下Ariel同埋食Mermaid餐喎~  又"迪迪黎"啦!~

仲記得對上一次去Mermaid Lagoon,  因為果度設計成"海底世界"一樣, 燈光比較暗, 所以小Aimee都驚驚地, 至於Mermaid show的超大巫婆仲驚親佢添!~   今次大個左喇, 唔驚之餘, 仲不知玩得幾開心添, 個Memaid show足足陪佢睇左3次呀!~

  幸子已經去過好幾次Disney Sea, 今次的主角係小Aimee, 所以絕大部份時間都留在Mermaid Lagoon~  小Aimee係小魚仙Ariel的fans嘛~  本來想買條新人魚裙仔比小Aimee, 可惜今次無咩靚款~

 

 

  對上一次黎, 果款Mermaid餐係粉紅色的小魚仙餐盒~ 今次轉左藍色的Disney Sea主題, 小Aimee一樣鐘意~ 買左2份餐, 另加一D小食~  裝住Jelly mousse果個Mermaid玻璃水杯都好靚架!~  

 

 

  玩夠食夠充去shopping喇~~~  見到全部mermaid的精品, 小Aimee當然好開心啦!  大豐收~

(參考資料: Tokyo Disney Sea http://www.tokyodisneyresort.co.jp/index.html)

 

 

 玩具店

幸子逛街shopping就當然專攻靚衫飾物化妝品等等, 小Aimee就梗係玩具店啦~   今次去左銀座, 新宿, 原宿, 上野, 吉祥寺等地方,  除左百貨公司的玩具部之外, 去銀座就會去"博品館" , 去原宿/表參道就一定去"Kiddy land" , 去上野的話就會去Yamashiroya… 

 日本的玩具精品又新款又靚, 仲有小Aimee最鐘意的卡通人物, 玩親都唔願走~ 幸子就乘機鼠出去行街街, 買夠再join返大Pooh&小Aimee再玩過~ hehe

 

  好"kawaii"的精品, 莫講話小朋友呀, 大人都睇到唔捨得走~

 

 上年春天去東京, 除左去LaQua的"姆明cafe"之外, 仲參觀左銀座三越的"姆明" 展覽.  今次行街街時又咁岩發現三越有"姆明"展, 有好多展品, 而售賣的精品都好靚架! 

 

手工店

喜歡各種手工的幸子當然要逛手工店&Zakka店啦~   之前試過為左一間店舖老遠去到"八王子"& "梅島"等地方.   但之前買落太多手工材料都未用, 所以今次入貨唔算多~ 淨係去左新宿三越ABC Crafts, 吉祥寺Yuzawaya… 今次行程的新目標就係"目黑"~  自由之丘係幸子最愛逛的地方之一, 除左多間最愛的甜品店之外, 仲有好多精緻的Zakka, 人形&手工店~  不過因為行程臨時有變, 今次無去到呀~  (下次再去啦~)

  好可愛的bear bear小店~  陶瓷彩繪教室的作品好精美啊~

 

  其中幾件handcraft戰利品~ 玩開Tole painting & Teddy Bear的朋友仔都應該會認得該artist吧!   最鐘意就係呢隻迷你小王子bear bear, 恨左好耐喇, 竟然比我遇上 (約3萬幾yen)~

 

 

 

 日本橋miniature展覽

日本橋的"丸善百貨"舉行一個miniature展覽, 展出"創作市場別冊「ミニチュアの世界」"的"掲載作品".  展品包括日本和海外多位世界級的著名miniature artists的迷你人形, 小熊, 花卉, 衣飾, 傢俱等等, 全部都十分小巧精緻而且像真度極高, 簡直令人嘆為觀止! 比在書本上見到的作品更具震撼力!~   小Aimee都睇到嘩嘩聲, 唔願走呢..

 

  展覽場地唔可以影相! 不過幸子在場外的小窗影左2張做記念~ hehe

 

  相片只係影到其中的一小角~  每一件展品都足以令人駐足慢慢觀賞, 再觀賞…..

 

  場內的限量紀念品:  古典小木桌&創作市場別冊「ミニチュアの世界」迷你版~

 

  原裝書 VS 迷你書