白鳥麗子在福岡

大件夾抵食　【多牛】

whitebird — Mon, 01 Dec 2008 05:04:19 +0000

早両日有老友到訪嘅関係、帶咗佢去食「日式BBQ」。呢間焼肉店我已経知道咗好耐、不過我両公婆都唔鐘意出市区、而且市区啲飲食店無停車場、另外要比停車場費好似又唔抵咁、而且聽講呢間嘢又要排隊先入倒去、所以咁耐我哋都無機会去試吓。自従幾個月前第一次試過之後、攪到我哋成日心思思咁好想食。有客人到就緊係要去。

呢度點解咁受歓迎？一個字＝「平」！咁、緊係要又平又好食先得啦。點平法？

特上カルビ（牛肋骨肉）１客４５０円、相中係２人前。

ロース（牛背肉）１客３９０円、相中係２人前。

佢哋個汁同一般嘅都有唔同、幾好味。肉嘅味道就更加唔駛講、好軟熟、入口溶化嗰隻。點解佢哋會賣得咁平？原來店主自営牧場、D牛係自己養嘅、所以咪可以平D益街坊囉。不過唔係任你叫o架、特上カルビ毎人最多叫２人前咋。下次有機会再嚟要嘆吓其他肉。最唔好嘅係佢哋個抽気設備做得唔係咁好、好似去咗黄大仙咁、食完番屋企要洗晒全身呀。♪～(￣。￣)

地址：福岡市博多区博多駅南１－５－３西園ビル

片片紅葉＠秋月城跡

whitebird — Fri, 14 Nov 2008 09:42:36 +0000

日本唔只多舊城堡、即使舊城堡無咗（自然天災或者人為消滅）、佢嘅舊跡一帯都會被保留。好似今日介紹呢個「秋月城跡」、係江戶時代黑田五萬石之靜穆城下町區、由濃綠的植物和山丘所組成、素有「小京都」之稱、係遊客「到此一遊」的必経之地、更加係欣賞紅葉嘅名所。喺日本一到９月、好多人會開始計画去邊度賞紅葉、即係楓葉。通常係１０月後段開始至１１月中段、係全国欣賞紅葉嘅日子（毎年日子都有差別）。雖然呢啲月份無嘜大假期、但一到週末好多家庭就會一家大細咁去附近嘅紅葉名所賞紅葉、攪到交通擠逼。「秋月城」原住所現已改建為中学、但周圍嘅環境都保存得好好、呢度係福岡睇紅葉嘅有名地方、好多旅行團都一定会嚟。

呢條叫做「杉の馬場」嘅路、両傍種満櫻花樹、喺春天亦都係欣賞櫻花嘅名所。我重未試過嚟呢度睇櫻花、因為真係好多人又難泊車、但係都心思思想搵年嚟睇吓。両邊有好多売店、亦都可以満足買「手信」嘅欲望♪～(￣。￣)。

秋月観光協会官式網業：http://www.akizuki-kanko.com/

交通手段：只可駕車前往復

虹ノ松原

whitebird — Sun, 26 Oct 2008 23:13:54 +0000

上次講到去咗佐賀県、一場去到點會食完魷魚就走、順便去埋附近嘅名勝、【虹ノ松原】（虹之松樹林）。呢度係日本三大「松樹林」之一、話説喺４００年前、当時嘅唐津藩主為咗防風防潮、從海岸線嘅砂丘開始種殖黒松樹、初時係無現在咁大規模、後来沿住海岸線延長、再由人工造林・自然播種至到目前嘅咁大規模。呢個松樹林約有５００ｍ濶、全長有成５Km、種有過百年嘅松樹、大大少少夾埋話有成１００萬棵。揸車経過呢度好似入咗一條松樹隧道（全程５分鐘左右）、都幾壮観o架。松樹遮蓋咗陽光嘅関係、一行入去邊咗陰陰涼涼、如果夏天嚟都可會幾涼爽。途中會有多處散歩道可以停車比你邊散歩邊欣賞松樹、都幾有情趣o架、腹仔餓重可以賣番個漢堡飽飲杯珈琲做下午茶。

呢架「唐津漢堡車」間中會喺福岡市四圍走、要撞彩先可以見倒買嚟食、我都係聽網上傳聞聽咗好耐、但都係無機会一試。今次好彩撞倒緊係要停車Break一Break啦。雖然啱啱食完飯重好飽、但都買咗一個同老公大人両份食試吓味。呢個唐津漢堡飽係即叫即整、Order完之後會問你車牌No.、你只要停好車坐喺度等、漢堡飽整好就會送到你架車度o架喇。
芝士漢堡３００円（無芝士２５０円）、熱珈琲２００円。新鮮熱辣辣整嚟我覺得最正係個飽、表皮脆卜卜、D醤汁又幾好味、好過麥記多多聲、幾乎想食多個咁滞。返咗嚟福岡過幾日、居然比我喺天神市中心三越附近発現有店舗、如果無時間去又想試吓呢個漢堡飽、可以喺呢度買嚟試喎。

＊想去「虹ノ松原」嘅朋友、由「博多駅」坐地下鉄就可直達「虹ノ松原駅」、車程１個鐘多D、単程１０１０円。

佐賀県呼子港

whitebird — Sun, 26 Oct 2008 19:56:25 +0000

佐賀県因為隣近福岡的関係、有時間我同老公都會順便去遊車河周圍行。上星期老公話突然想去食魷魚、而佐賀県嘅呼子港係出名食「活いか」魷魚刺身嘅地方、所以就突然決定起行、點知天公不造美、出門口就開始陰天、跟住就一直落雨。由福岡市内上「都市高速」好快唔駛一個鐘已経到達福岡市西区（佐賀県嘅呼子港就喺福岡市西区嘅隔離）、再行多條有料道路好快就到達呼子港。呼子港的朝市是日本三大朝市之一、当日係雨天而且到達時間比較晏、去到已経無嘜嘢睇。其實在朝市裡、剛捕撈的海產品隨處可見、遊客可品嘗到新鮮的海産、有興趣嘅朋友就要早少少出發喇。

呼子港的魷魚刺身點解咁出名、係因為魷魚身透明非常獨特、好難在其他縣可以見。到達呼子港附近都會見倒唔少食海鮮嘅舗頭、全部都係以活魷魚做主打、即使唔食魷魚嘅朋友亦有其他種類嘅海産提供。

我哋行咗一週、発覚平均一個「いか活造り定食（活魷魚刺身定食）」約２６００円前後、靚D嘅餐廰或者景色靚嘅緊係貴D。我哋喺呼子大橋附近搵倒間喺門口写住「定食２２８０」円嘅【いか太郎】、就即刻停車入去試吓。入去睇吓個menu発覚入面無門口写住個価錢、普通嘅「活造り定食」要２６５０円（魷魚刺身・小鉢・茶碗蒸・飯・味噌汁）。咁就問吓店員、原來唔跟小鉢同茶碗蒸嘅話就係２２８０円（有白飯同味噌汁）。睇電視就睇得多、當活魷魚刺身嚟到面前就好興奮、真係透明o架！重郁郁哋添！因為魷魚重係半生死嘅関係、佢嘅魷魚鬚吸盤重郁緊、如果就咁食可能會危険（塞住喉嚨）、所以D魷魚鬚佢哋可以幫你整熟嚟食、可以天婦羅同鹽焼任揀。

鐘意食魷魚刺身嘅朋友、要嚟呢度試吓喇、如果唔係自駕遊嘅朋友、由福岡機場・博多或者天神都有巴士直達呼子港、車程約２個鐘、双程車費＝１７００円、詳細睇呢嗰HP啦。

http://www.rakubus.jp/rosen/fko_krt_ybk.html

博多湯

whitebird — Sun, 26 Oct 2008 19:52:19 +0000

自従結咗婚搬咗嚟福岡後、最少両個星期會去一次温泉、冬天甚至會一個星期去一次、因為我両公婆都太鐘意浸温泉喇。但係浸得多温泉、都會有少少講究、唔係唔理三七廿一就邊間都去喎、毎憑去啲新發堀嘅温泉設施、我哋都會做過調査先、除咗嗰日無端端経過就衝動入咗去啦。調査嘜嘢？就係要睇真啲呢間係唔係「純天然」嘅温泉。點様可以知係咪純天然温泉、睇吓有無標明「掛け流し」呢幾個日本字。喺幾年前、因為日本発生咗「偽装温泉問題」、有些不良店主利用「温泉入浴剤」或者只係普通嘅水喉水就話係温泉水嚟做生意、比人掲發咗之後、日本嘅温泉協会引入新条例、各温泉設施内須貼上「温泉分析書」、而「温泉分析書」内必須列明有無加温・加水、有無使用循環濾過装置、有無使用入浴剤或者消毒剤等。如當店列明「掛け流し」係表示該温泉係無使用循環濾過装置嘅天然温泉、但可能會因為泉水嘅温度太熱或者唔夠熱須要加水去加温或降温。如写明「源泉掛け流し」的話就代表該温泉係１００％直接由源頭湧出、無加水或任何消毒剤或無循環使用。

今日介紹嘅呢間就係１００％「源泉掛け流し」、純天然温泉「博多湯」。「博多湯」位於福岡市隔離筑紫野市嘅二日市。呢個二日市雖然有個「市」字、但只係地区名唔係「市」。由天神嘅「西鉄福岡駅」坐電車只需２０分左右就到達「西鉄二日市駅」、由「博多駅」出発嘅話坐JR只需２５分左右就到達「二日市駅」。由車站行１０分鐘左右就可直達二日市温泉街、雖然話係温泉街、但呢個係比較規模細嘅温泉街、唔係有太多温泉施設、比較受歓迎嘅就係呢間「博多湯」。我鐘意嚟呢度嘅最大原因係、好平。入浴料毎人３００円、毛巾当然自備、不過無帯嘅話佢哋都有毛巾出售。不過、咁平緊有缺點嘅。唔好睇佢層樓咁大、入面係好細咋。樓上全部係比人休息用同埋食嘢、地下先係温泉。温泉入面都好狭窄、沖涼嘅花洒又少、如果多人嗰陣時、花洒都要排隊。所以我通常都會揀平日去、假期去就太迫喇。如果想慢慢舒舒服服咁浸、就緊係要去温泉旅館啦、但唔想離開市区去到咁遠又想体験吓浸温泉、呢間都係唔錯嘅選擇。

天然温泉　博多湯　源泉掛け流し

〒818-0058　福岡県筑紫野市湯町1丁目14-5

℡092-922-2119

営業時間:9:00-21:00年中無休

公式網業: http://www.hakatayu.jp/index.htm

關於白鳥麗子

admin — Fri, 20 Jun 2008 04:32:44 +0000

1989 年、筆者人生第一次的海外旅行－九州。受到日本漂亮又清潔的街頭深深吸引、自始對日本文化引起興趣、90 年開始到夜校研修日本語、92 年春天更隻身留学到日本四国香川県、日本語学校畢業後再到専門学校進修、主修「酒店旅遊業務課程」。

3 年的留学生活另筆者更加了解和愛上日本、與日本結下一個不解的情意結。回香港後進入日系企業上班、放假時亦都無放過機会去日本各縣旅行、更感染不少身邊朋友和同事引起興趣去學習日本語。

05 年下嫁日本先生移居福岡做個専業主婦、閑時鐘意研究料理、四圍物色美食、探訪各地温泉名勝、更是一位業餘兼職翻譯導遊。